اتجوزت من 3 سنين وجوزي كان بيعملي كل حاجه نفسي فيها

اتجوزت من 3 سنين وجوزي كان بيعملي كل حاجه نفسي فيها
هدايا ومعامله حلوه وكلامه كله خير
اشتغلت وهو كان بيصرف برضه ع البيت
كان معاه الفيزا بتاعتي وبيقبضلي واقوله عاوزه اجيب طقم كذا يديني وكنت بقول دي فلوسي
امي قعدت تزن ع دماغي
بياخد منك قبضك لي هاتي فلوسك منه هشلهالك وقعدت تقولي هيحوش ويتجوز عليكي بفلوسك
فضلت ورايا لحد مقولتله هات الفيزا هقبض لنفسي
قالي لي قولتله كده دي فلوسي وانا مش مسؤله ادفع جنيه للبيت هو انت مش راجل وقادر تصرف ع البيت وكلمته ب اسلوب مش كويس خالص
دخل جوا جاب الشنطه اللي كنت بروح بيها الكليه اول متجوزنا
وطلع منها فلوس وطلع الفيزا وقالي خدي دي فلوسك من اول مشتغلتي مش ناقصين جنيه حتي فساتينك ومكياجك ومصروف موصلاتك مش من مرتبك ودي الفيزا بتاعتك وخد الواد نيمه ودخل نام
خدت الفلوس تاني يوم عديتها ع امي وقولتلها شيليها معاكي
ومشيت ع شغلي
قعدت امي تزن عليا تقولي متوفريش فلوس متخلهوش يحوش فضلت اصرف ع البيت واجيب حاجات ملهاش اي لزمه وهو ولا بيتكلم وساكت واقوله جبت كذا وكلنا كذا يقولي بالف هنا
بعد كل ده مكنتش عارفه انا بعمل كده لي كاني كنت تايهه
لحد ماجه كلمني وقالي هو انتي بقيتي تتكلمي في ماديات كتير لي
هو انتي شايفه ان فيه حد معك في شغلك عايش احسن منك
قولتله انا ملزومه منك والمفروض اللي محتاجاه اجيبه
قالي اللي محتاجاه واللي هينفعك او ينفع بيتك
انما كل شوي تشتري حاجات بتترمي ومحدش هيستعملها لي
هتستفادي اي لما تخليني امد ايدي لحد
انا بروح الشغل كل الناس بتجيب اكل وانا اقولهم لا اللي يخليني اشتري فراخ او كفته او غيره طب مجيبهم لعيالي فالبيت وناكل سوا
قولتله حد قالك متاكلش كل برحتك ولما تحتاج فلوس هسلفك
قالي انا لو هشحت من الناس فالشارع كل واحد جنيه مش همد ايدي واخد منك جنيه
قولتله احسن برضه انا فلوسي شيلاها لابني
من وقتها وهو مبقاش يتكلم معايا
ييجي من شغله يتعشا وينام