دلوقت انا اتجوزت وانا عندى ٣٨ سنة وقاعدة في بيت عيلة

#مشكلة عضوة
دلوقت انا اتجوزت وانا عندى ٣٨ سنة وقاعدة في بيت عيلة كالعادة لمعظم البنات..حماتى عندها بنت سنها ٢١ سنة لسة متجوزتش وقاعدة معاها طبعا في شقتها وانا في شقة وليا سلفتين تانيين حماتى قايلة لكل واحدة فينا تنزل يوم تعمل الشقة بالنسبة للطبخ مش بتحب حد يطبخ لها بتحب تاكل من ايديها وبنتها دلوعة ع حس كل واحدة فينا ...المهم قلت لجوزى لو كانت والداتك مش عندها بنت كنت خدمتها بعينيا لكن كدة كفاية عليا شقتى ونفسي وانت لانى لسة بقالى سنة واحدة متجوزة ومش معايا اطفال المهم قالي عارف كلامك صح لكن اشتري خاطري قلت له حاضر وسكت منعا للمشاكل وهو علشان طيب ومشى الوضع ع كدة... امبارح بعد ما خلصت عند حماتى وقاعدة بستريح علشان اطلع شقتى لاقيت اخت جوزى بتقولى بقولك قومى اعملى لى شاي طبعا انا اڼصدمت من الكلمة يعنى هى وصل لكدة كمان انا بقا كدة خدامة رسمي اخدت الموضوع بهدؤ وهزار وقلت لها انتى بنت حلال انا كمان دماغى وجعانى قومى بقا انتى اعملى لينا احنا الاتينين وورينا شطارتك لانى خلصانه قالت لى يعنى اي بقولك قومى انا تعبانة قلت لها عيب انا مش بشتغل عندك اتكلمى باسلوب احسن كدة من كدة انا اكبر منك كمان قالت لى اه ما انا عارفة دة كويس من قبل ما اخويا يدبس قال من همه اتجوز واحدة قد امه باللفظ كدة بصراحة انا ساعاتها معرفتش اي حصل لى صعبت عليا نفسي ولا قلبي بقا ڼار قلت لها يعنى انتى عاوزة شاي حاضر دخلت ع المطبخ جبت مية من السخان بس من حظها كانت لسة دافية في الحنفية كان نفسي تبقا مولعة ومليت كوياية وعليها سكر وشاى وطلعت بعزمى ومسكت الكوباية وروحت كبها ع شعرها ووشها وقلت لها اشربي الشاي انتى قليلة الادب وامك دلعتك وانا اللى هربيكى امها طلعت من جوة ع الصويت وشتيمة وقلة ادب طلعت ع شقتى واخدت هدومى وروحت لاهلى ودلوقت جوزى مغلطانى بيقولى تستنى لما اجى وتقولى لى مش ارجع الاقي حريقة دة امى واختى هل فعلا انا كدة غلطت ؟
#منقول