انا منفصله وعندي بنت 13 سنه وتوأم ولدين

السلام عليكم ورحمة الله وبركاته
انا منفصله وعندي بنت 13 سنه وتوأم ولدين
بنتي كل لما تعمل حاجه غلط واعاقبها تقولي انا عايزه اروح اعيش عند بابا لحد امبارح عملت حاجه ضايقتني جدا فضلت ازعقلها ع الاستهتار بتاعها وكده
وبعد شويه لقيتها جايه تقولي انا عايزه اروح اعيش عند بابا قولتلها روحي وده لانها كل شويه تقولي كده قولت اقولها روحي علشان هي تلاقيني انا مش بتهدد ومتقولهاش تاني
وفعلا لقيتها بعدها بوقت كبير قامت ولمت هدومها من نفسها كده وانا تجاهلتها علشان متفكرش انها تلوي دراعي
وباباها اتصل بيها بعدها قالتله انا عايزه اجي اعيش معاك اول رد رده عليها قالها ليه هي امك اتجوزت قالتله لأ قالها طيب ليه عايزه تيجي تعيشي معايا قالتله علشان ماما كل لما اعمل حاجه غلط تزعقلي رد وقالها لما اغير السكن اللي انا فيه حبقى اخدك
قالتله انا لمېت حاجتي
قالها وهي سيباكي كده عادي قالتله اه قالها طيب خلاص حااخدك انتي واخواتك قالتله لأ هي عايزاهم انا كنت متفاجأه باللي هي بتقوله
قالها عرفيها الكلام ده اني حااخدكم انتم التلاته
خليتها قالتله ماما مقالتليش امشي ماما عيزانا انا اللي عايزه امشي قالها حكلمك تاني وبعدها بوقت كبير اتصل وقالها انزليلي وخدها وقعد بيها في مكان
لقيتها رجعت بعدها بساعه بتقولي انا حااخد حاجتي وماشيه
قولتلها باباكي قالك ايه قالتلي سألني انتي ليه عايزه تعيشي معايا قولتله علشان ماما بتزعقلي ومتكلمش في اي حاجه تانيه بالعكس قالها اطلعي هاتي حاجتك قولتلها وحتسبيني وتمشي وانا بعيط قالتلي اه
ومشيت من غير حتى ماتسلم عليا
قلبي واجعني اوي من القهره مش مصدقه انها عملت معايا كده مع اني والله العظيم مفضلاها عن أخواتها الولاد في كل حاجه لانها البنت الوحيده حرفيا بستخسر في نفسي كل حاجه علشانهم
قلبي مقهور ومكسور اوي ومش عارفه اعمل ايه وهل هي حترجع تاني ولا خلاص كده
اسفه اني طولت عليكم بس محتاجه حد يقولي اعمل ايه