تصرفات جوزي الغريبة

مشكلة جديدة معانا 👇👇
السلام عليكم ... انا عمري ما فكرت اكتب مشكلتي او اتكلم عنها ... بس لقيت بيدج اجتماعي و محدش يعرفني احب اقول اني متجوزة واحد اهبل و مفكر نفسه دمه😕😕 خفيف و مش عارفة اتصرف معاه ازاي ... تصرفاته صيبيانية .. ممكن يخطف ايس كريم بتاعة ابنه و يقعد يجري و يسيبني اقعد اصالح ف ابني اللي جعورته مش بتتقفل و كل ده و احنا ف الشارع😡😡😡 . ..

[[system-code:ad:autoads]]

ممكن اكون ف عز نومي ... الاقيه بيصورني و انا منكوشة و يحط صورتي ع جروب عائلي و يضحكوا عليا ... اصلا عيلته فرافيش زيه بالظبط و مش بيهمهم ... بس انا ذنبي ايه ... ممكن يحط ملح ف كوباية الشاي بتاعتي او بتاعة امي و هي ف زيارة ليا و يقعد يضحك زي العيال 😠😠😠...
انا تعبت ... هو إنسان كرييييييم لاقصى درجة بيفسحني ف احسن الأماكن و يوديني كل سنة مصيف شكل ... بس أفعاله العبيطة دي بتتحسسني انه تافه ... ده مرة لقيته بيقولي استني فيه حاجة ف وشك ... و بعد شوية اكتشفت أنه حط ع وشى لون أخضر وانا اقول الناس بتبص علي باستغراب ليه 😠😠
كنا عاملين عيد ميلاد لابننا ... جه جنب ودن صحبتي و فرقع بالونة ... صاحبتي نطت من ع الكرسى و البيبسي وقع ع هدومها و ابنها جاتله حالة ړعب و مشت و هي زعلانة و كلمتني قالتلي جوزك اهبل
...انا دلوقت باخاڤ جدا لما نخرج مع بعض ف اي مكان و بادعي ربنا يعدي اليوم ع خير... انا نبهته اكتر من مرة و عملت الف مشكلة بسبب الاستظراف ده. .. تعبت بجد
انا عندي ولد و بنتين ... خاېفة اوي م المستقبل ... و بالذات البنات كبرت و بقوا بيتضايقوا من تصرفات ابوهم معاهم و مع صاحباتهم و مفيش فايدة😭😭
ارجوووكم افيدوني